Mripuko mkubwa ndani ya kambi ya kijeshi ya Marekani Afghanistan.

                      Watu wanne wameuwawa Jumamosi (12.11.2016) katika mripuko uliotokea ndani ya kambi kubwa kabisa ya kijeshi ya Marekani nchini Afghanistan na kujeruhi wengine kumi na nne ambapo utaifa wao haukuweza kufahamika mara moja.
Kundi la Taliban limedai kuhusika na mripuko huo uliotokea ndani ya kambi ya kikosi cha anga ya Bagram kaskazini ya mji mji mkuu wa Kabul yenye ulinzi mkali wakati waasi wa kundi hilo wakizidisha mashambulizi yao nchini kote kabla ya kuanza kwa kipindi cha majira ya baridi ambapo kwa kawaida mashambulizi yao hupunguwa.
Msemaji wa gavana wa jimbo la Parwan Waheed Sediqi ambako ndiko ilipo kambi hiyo ya Bagram amesema mripuko huo umesababishwa na mtu aliyejitolea muhanga ambaye amejiripua karibu na eneo la huduma ya chakula ndani ya kambi hiyo.
Sediqi ameliambia shirika la habari la AFP kwamba bado hawajui utambulisho wa wahanga lakini mshambuliaji ni mmojawapo wa wafanyakazi wa hapo.
Marekani ina takriban wanajeshi 10,000 nchini Afghanistan ambapo kikosi kikubwa kiko katika kambi hiyo ya Bagram. Shambulio hilo linaonyesha ikiukaji mkubwa wa taratibu za usalama ndani ya mojawapo ya vituo vya kijeshi vyenye ulinzi mkubwa kabisa nchini Afghanistan.
                                                       Taliban yadai kuhusika
                               Kamanda mkuu wa Marekani na Jumuiya ya Kujihami ya NATO nchini Afghanistan John Nicholson ametowa rambi rambi kwa familia na marafiki wa wahanga waliopoteza maisha yao katika shambulio hilo na kuwahakikishia kwamba jamaa zao waliojeruhiwa wanapatiwa huduma nzuri kabisa na wataendelea kuzingatiwa mawazoni.
Msemaji wa kundi la Taliban Zabihullah Mujahid amesema kundi hilo la waasi limehusika na shambulio hilo ndani ya kambi ya Bagram na kudai kusababisha maafa makubwa kwa wanajeshi wavamizi wa Marekani.Kambi hiyo ya Bagram imekuwa ikishambuliwa mara kwa mara na waasi wa kundi hilo la Taliban.
Mwezi wa Disemba mwaka jana mshambiliaji wa kujitowa muhanga wa kundi la Taliban aliyekuwa akiendesha piki piki aliuwa wanaheshi sita wa Marekani karibu na kambi hiyo hilo likiwa mojawapo ya shambulio lililosababisha maafa makubwa dhidi ya vikosi vya kigeni nchini humo kwa mwaka 2015.
                                                  Kuongezeka mashambulizi

                                Wanajeshi wa Afghanistan karibu na kambi ya Balgram.

Shambulio hili la Jumamosi linakuja baada ya lori lilosheheni mabomu kubamizwa na ubalozi mdogo wa Ujerumani katika mji wa Mazar-i-Sharif kaskazini mwa Afganistan hapo Alhamisi usiku na kuuwa takriban watu sita na kujeruhi wengine zaidi ya 100.
Kuongezeka kwa mashambulizi hayo dhidi ya vituo vya mataifa ya magharibi kunakuja siku chache tu baada ya kumalizika kwa uchaguzi wa rais wa Marekani uliokuwa na ushindani mkali.
Suala la Afghanistan lilikuwa halikupewa uzito wakati wa kampeni za uchaguzi nchini Marekani juu ya kwamba hali nchini humo inaweza kuwa suala la dharura kwa rais mpya wa Marekani.
Rais mteule wa Marekani anatarajiwa kurithi vita vya Marekani vilivyochukuwa muda mrefu kabisa na havina dalili ya kumalizika hivi karibuni.

Utajiri wa mtoto wa rais wa Angola

                                                                 

 Isabel Dos Santos ni binti wa kwanza wa Rais Jose Eduardo Dos Santos wa Angola na anamiliki utajiri wa kiasi dola bilioni 3.2 za Kimarekani, unaomfanya kuwa ndiye mwanamke tajiri kabisa barani Afrika.
Binti huyo amejijengea himaya yake kwa mapana na marefu na hasa katika mji mkuu Luanda ambao ni miongoni mwa miji ya kifakhari na ghali kabisa duniani.Unapotembea katika mji mkuu wa Angola, Luanda, ni vigumu sana kushindwa kuitambua au kukumbana na alau kampuni moja ya Isabel Dos Santos. Binti huyo wa kwanza wa Rais Eduardo Dos Santos na ambaye ni mwanamke tajiri kabisa barani humo amejenga himaya yake ya utajiri katika moja ya miji ghali kabisa duniani -kutoka sekta ya mawasiliano, benki, televisheni ya setelaiti hadi kwenye spoti - kote huko anamiliki biashara kubwa zenye majina mjini Luanda.
Isabel anahodhi kampuni ya Unitel, ambayo ni kampuni kubwa kabisa ya simu za mkononi nchini Angola ikiwa na matawi 81 ndani ya mji huo mkuu pekee na zaidi ya wateja milioni 10 nchi nzima. Anamiliki msururu wa maduka makubwa, huku akiwa pia na hisa katika mabenki ya BIC na BFA sambamba na katika kampuni ya saruji ya Nova Cimangola.
Umiliki wa kampuni kubwa za mafuta
Na kama haitoshi, mwanamama huyo anasimamia kampuni kubwa ya mafuta inayomilikiwa na serikali ya Sonangol pamoja na klabu ya soka ya Petro de Luanda inayofadhiliwa na kampuni yake.
Almuradi, orodha ya utajiri wa Isabel Dos Santos ni ndefu ikijumuisha pia sekta ya afya na uhusiano wake na kliniki kubwa kubwa nchini humo bila ya kuiweka kando sekta ya biashara ya madini, anasema mwanachama wa upinzani, Nelito Ekuikui:
''Tunaweza kuzungumzia pia sekta ya afya na uhusiano wake na kliniki kubwa kubwa za humu nchini bila ya kusahau sekta ya madini. Kampuni hiyo  hazina ushindani. Hilo ni tatizo kubwa kwa nchi kwa sababu ni vigumu sana kwa wafanyabiashara wengine. Endapo tungekuwa na wafanyabiashara  wapya tungekuwa na nafasi nyingi za ajira.''
                                                                             

Taswira ya Isabel kwa Waafrika
Baadhi ya watu wanamuangalia Isabel Dos Santos kama mfano wa wafanyabiashara barani Afrika ambao wametoa nafasi za ajira zinazohitajika kwa kiasi kikubwa, katika taifa ambalo asilimia 24 ya watu hawana kazi, kwa mujibu wa takwimu za mwaka 2014. Lakini Nelito Ekuikui haliangalii suala hilo kwa jicho sawa na hilo. Yeye anasema utajiri wa Isabel na biashara zake nchini Angola hazina mpinzani na hilo ni tatizo. Mwanaharakati wa Angola, Benmedoto Jeremias, anasema kwamba kuwa binti wa rais wa nchi kumemrahisishia mwanamama huyo shughuli zake zote ikilinganishwa na wawekezaji wengine, ''Kila kitu anachokimiliki Isabel Dos Santos kimetokana na upendeleo na fursa anazopata kutoka kwa baba yake. Sio mali alizopata kwa juhudi zake''
Kwa upande mwingine, mwandishi habari Rafael Marques ambaye amekuwa akifuatilia mzizi wa utajiri wa Isabel Dos Santos kwa kipindi cha miaka mingi, anasema kwamba baba yake, Jose Eduardo Dos Santos, amekuwa na dhima kubwa katika kumjengea utajiri huo.
Mwandishi huyo wa habari wa Angola aliiambia DW mapema mwaka huu kwamba kila alichokitaka Isabel, baba yake alihakikisha anakipata. Dos Santos alitumia hadi nafasi yake kama rais kumpa mwanamwe huyo majukumu ya kusimamia fedha katika mikataba mikubwa mikubwa ya serikali, ingawa mara nyingi Isabel amekuwa akizipinga tuhuma hizo za kupendelewa.
Na baada ya kuiongoza kampuni kubwa ya nishati ya mafuta ya Sonangol na kufikia hatua hadi ya kuwa mwekezaji mkubwa nchini Ureno, mkoloni wa zamani wa Angola, wapinzani wanahisi hana tena pa kwenda na sasa huenda akageukia kujaribu katika siasa. Mwanaharakati Benedito Jeremias anakubaliana na hilo akisema mrembo huyo wa miaka 43 huenda ikawa hata ana mipango ya kukirithi kiti kinachokaliwa na baba yake.

Tume ya uchaguzi DRC yahusishwa na kadhia ya rushwa

                        Gazeti moja la Ubelgiji limechapisha ripoti wiki iliyopita likisema kuwa tume ya uchaguzi ya Congo imelipwa takriban dola milioni 2.4 kama ada kwa benki zenye uhusiano na rais wa DRC, Joseph Kabila.
Gazeti hilo pia limesema tume hiyo ilitoa kiasi cha dola milioni 7.5 fedha taslimu kutoka benki ya BFGI, kwa sababu ambazo haziko bayana. Madai hayo yanahusishwa na mkopo wa dola bilioni 25 ambao benki uliuotoa kwa tume hiyo ya uchaguzi inayojulikana kama CENI.
Uchaguzi wa DRC ulitarajiwa kufanyika mwezi huu, lakini umeakhirishwa mpaka Aprili 2018. Serikali imedai kwamba ukosefu wa rasilimali za kifedha unaoikumba CENI ni moja ya sababu kuu kuhusiana na uchelewesho huo.
Rais wa shirika la kisheria la Congo, Georges Kapiamba ameiambia VOA kuwa ugunduzi huo unatia wasi wasi mkubwa hasa kutokana rasilimali ambazo wamepewa CENI na kwasababu tume ya uchaguzi ilijidai kuwa haitaweza kuandaa uchaguzi kulingana muda uliowekwa kikatiba kwa misingi kuwa haikuwa na fedha za kutosha.
Kapiamba amemuandikia mwanasheria mkuu wa Congo akimtaka kuchunguza suala hili. Lakini hatarajii kuwa ombi lake litashughulikiwa.
Kulinga na ujuzi wetu katika siku zilizopita, Kapiamba amesema, hawana imani kuwa mwanasheria mkuu anaweza kutekeleza hilo kwa uhuru kama ambavyo tungependa. Kapiambia anadai kuwa wale wenye rasilimali au wale ambao wako kwenye chama tawala wanaweza kulindwa kwa chochote kile ambacho wanakifanya au vitenda vyao.
Serikali ya Ubelgiji pia imetaka uchunguzi kamili ufanywe.
Kwa mujibu wa benki, ada hizi si za kawaida kupewa kiwango hiki cha mkopo, wakati rais wa CENI amedai kwamba kutoa fedha taslimu kutoka katika benki ilikuwa ni kwa ajili ya malipo ya mishahara, kukodi magari na kununua mafuta katika sehemu za ndani za nchi ambako hakuna huduma za benki.
Ugunduzi huo umevutia mtizamo wa ziada kwasababu kaka wa kambo wa Kabila ni mkuu wa BFGI na moja ya dada zake rais aliorodheshwa kuwa mmiliki wa asilimia 40 katika benki kuanzia Oktoba 2014.
Shutuma hizi, ni chanzo cha nyaraka ambazo zimepelekwa kwenye vyombo vya habari na mfanyakazi wa zamani wa BFGI, na pia zilimlenga Albert Yuma, rais wa Gecamines, kampuni ya taifa ya uchimbaji madini, na mshirika wa karibu wa Kabila.

Trump: Sitafuta mpango wa Obamacare

                                                                      

Rais mteule wa Marekani Donald Trump aliyefanya kampeini ya kupinga Bima ya afya inayofaahamika kama Obama care, sasa amesema atafanyia marekebisho machache kipengee cha sheria juu ya bima hiyo ya matibabu kwa gharama nafuu.

Katika mahojiano ya kwanza tangu achaguliwe rais siku ya Jumanne, Trump ametangaza mageuzi makubwa ya sera punde atakapochukua nafasi ya Barack Obama katika Ikulu ya White House mwezi Januari mwaka ujao.
Trump, aliyesisitiza vikali kuwa atafutilia mbali bima hiyo inayowapa fursa mamilioni ya Wamarekani maskini kupata huduma ya afya kwa bei nafuu punde tu atakapochaguliwa rais, yaonekana amebadilisha msimamo wake juu ya suala hilo.
Na Katika kile kinachoonekana kulegeza msimamo wake juu ya mpinzani wake Hillary Clinton, Rais huyo mteule amesema,Clinton ni mwanamke mkakamavu na mwenye tajiriba kubwa.

Uchunguzi waanza kutokana na kuchomwa kanisa la kihistoria Marekani

Maafisa wa usalama wa Marekani wameanzisha uchunguzi wa haki za kiraia baada ya kanisa moja la watu weusi katika jimbo la kusini la Mississipi baada ya kuchomwa moto na kuandikwa kwa rangi alama ya “Mpigie kura Trump” .
Kanisa hilo la kihistoria lililojengwa miaka 111 iliyopita la Hopewell Missionary huko Greenville Mississipi liliharibika sana kutokana na maji mengi ya kuzima moto na moshi hapo Jumanne usiku.
Meya wa Greenville Errick Simmons alisema kwamba wanalichukulia tukio hilo kama uhalifu wa chuki kwasababu ya ujumbe wa kisiasa ambao wanaamini ulikuwa na lengo la kusababisha kitisho kwsa waumini wapiga kura.
Anasema kitendo hicho ni shambulio la moja kwa moja dhidi ya haki ya wananchi kuabudu kwa uhuru.
Meya huyo alisema kwamba Idara ya upelelezi wa jinai , FBI na idara ya upelelezi ya jimbo la Mississipi wanasaidia katika uchunguzi huo.

Kiongozi wa IS asema hakuna kusalimu amri

Wakati vikosi vya Iraq vikizidi kuusogelea mji wa Mosul, kiongozi wa wapiganaji wa kundi linalojiita Dola la Kiislamu IS Abu Bakr al-Baghdadi amewatumia ujumbe wa sauti wapiganaji wake akiwataka kutosalimu amri dhidi ya majeshi ya serikali. Kiongozi huyo amesikika akisema "hakuna kusalimu amri" na kuwaambia wapiganaji kwamba ni heshima kuilinda ardhi hiyo kuliko kusalimu amri kwa aibu. Huo ni ujumbe wa kwanza kutolewa na kiongozi katika kipindi cha mwaka mmoja na kumekuwa na tetesi juu ya afya na harakati za kiongozi huyo lakini hajulikani alipo. Mwezi Juni mwaka 2014, alijitokeza hadharani mjini Mosul na kutangaza Dola la Kiislamu nchini Iraq na Syria. Muungano wa kijeshi unaoongozwa na Marekani na unaovinga mkono vikosi vya Iraq, unakadiria kuwepo kiasi ya wapiganaji 3000 hadi 5000 wa IS ndani ya mji wa Mosul.

Wikileaks yachapisha barua pepe mpya kuhusu Clinton

Mtandao wa Wikileaks umechapisha barua pepe mpya kutoka kwa mkuu wa timu ya kampeni ya Hillary Clinton, John Podesta. Barua pepe hizo zinaonyesha wizara ya mambo ya nje ikimueleza Clinton juu ya ripoti inayohusu taarifa za matumizi ya barua pepe binafsi. Katika taarifa zilizoko ndani ya barua pepe za Clinton, kunaonekana kuwepo na uratibu wa karibu kati ya wizara na timu ya kampeni ya Hillary Clinton na zinapendekeza kwamba huenda afisa wa serikali alimdokeza Bi. Clinton kuwa taarifa zake za matumizi ya barua pepe binafsi ziko karibu kujulikana. Timu ya kampeni ya Clinton inaishutumu Wikileaks kwa kutumia taarifa zilizodukuliwa na Urusi katika jitihada za kuingilia uchaguzi wa nchi hiyo. Wagombea wote wawili Donald Trump wa Republican na Hillary Clinton wa Democrats wameendelea kutupiana vijembe katika kampeni za lala salama kabla ya kufanyika kwa uchaguzi.